အရမ်းကို မှောင်မည်းနေတဲ့ လမိုက်ည တစ်ညရဲ့ သန်းခေါင်ယံ အချိန်၊ ခြံကျယ်ကြီး တစ်ခြံထဲက နှစ်ထပ်တိုက်ရဲ့အပေါ်ထပ်မှာ လူသုံးယောက် အိပ်နေကြတယ်။ အဲဒီအချိန်မှာ အောက်ထပ်ကနေ ကျွီဆိုပြီး တံခါးပွင့်လာတဲ့ အသံကို သူတို့ သုံးယောက်စလုံး ပြိုင်တူ ကြားလိုက်ကြရတယ်။ သရဲ သိပ်ကြောက်တဲ့ သူက..သရဲ..သရဲဆိုပြီး အော်ဟစ်လို့ ခေါင်းမြီးခြုံနေလိုက်သတဲ့။
သရဲကိုမယုံ၊ဒါသူခိုးဝင်တာပဲ ဖြစ်ရမယ်လို့ထင်တဲ့ နောက်တစ်ယောက်ကတော့ တွေ့တဲ့ပစ္စည်း ကောက်ကိုင်ပြီး အောက်ထပ်ကို ဆင်းချသွားလေရဲ့။ သရဲလည်း မသိ၊ သူခိုးလည်း ဂရုမစိုက်တဲ့ နောက်ဆုံး တစ်ယောက်ကတော့ တုတ်တုတ်မျှ မလှုပ်၊ ဆက်အိပ်နေလိုက်တယ်။ ဒီဖြစ်စဉ်ကို ကြည့်ရင် ကျွီ ဆိုတဲ့ အသံလေးက လှုံ့ဆော် လိုက်တာချင်းတော့ တူတယ်၊ ဒါပေမဲ့ သူတုိ့ တစ်ယောက်ချင်းစီရဲ့ ခံယူချက်ပေါ် မူတည်ပြီး သူတို့ရဲ့ တုံ့ပြန်ပုံ ကွာသွားတာကို တွေ့ရပါလိမ့်မယ်။
အခက်အခဲဆိုတာကို စိတ်ညစ်စရာလို့ မြင်ပြီး ဝေးဝေးက ရှောင်ချင်တဲ့သူက အသက်ကြီးလို့သာ လူကြီး ဖြစ်သွားရုံရှိနေချိန်မှာ အခက်အခဲတွေ စိန်ခေါ်မှုတွေဆိုတာ ကိုယ့်ရဲ့ တိမ်မြုပ်နေတဲ့ အရည်အသွေးတွေ ပေါ်လာဖို့အတွက် အခွင့်အလမ်းပဲလို့ ခံယူပြီး တက်တက်ကြွကြွ ရင်ဆိုင်ကျော်လွှားလိုက်တဲ့သူက ဘ၀မှာ အများ လေးစားရသူအဖြစ် အောင်မြင်လာတယ်။
ဆင်းရဲကျပ်တည်းတဲ့ မိသားစုက ပေါက်ဖွားလာတာချင်းတူပေမယ့် တစ်ယောက်က ဒါကို စိတ်ထွက်ပေါက် ပေးရင်းနဲ့ လူဆိုးလူမိုက် စာရင်းဝင် ဖြစ်သွားတယ်၊ နောက်တစ်ယောက်ကတော့ ငါ ဒီအခြေအနေ အဆိုးကနေ လွတ်မြောက်ဖို့ ပညာမှတစ်ပါး တခြားလမ်း မရှိဘူးလို့ ခံယူပြီး ကြိုးစားလိုက်တာ ပါမောက္ခ ကြီးတွေ သူဌေးကြီးတွေ ဖြစ်လာကြတယ်။
တကယ်တော့ ကျွန်တော်တို့ဟာ ဖြစ်ပေါ်လာတဲ့ အရာတွေကို ရွေးချယ်လို့ မရပါဘူး၊ ကျွန်တော်တို့ ရွေးချယ်လို့ရတာက အဲဒီ အဖြစ်အပျက်တွေ အကြောင်းအရာတွေကို ဘယ်လို ခံယူချက်မျိုးထားပြီး တုံ့ပြန်မလဲ ဆိုတာပါပဲ။
Credit : Dr .Phio Thiha
အောင်မြင့်မြတ်(Myanmar Youths)
0 comments:
Post a Comment